Istorgia

Nossa istorgia

I’l rom d’ün’ufficina d’avegnir dal cumün da Sent chi ha gnü lö in november dal 2005 s’ha fuormada üna prüma gruppa da lavur chi ha realisà infra cuort temp l’idea d’ün lö d’inscunter e da cultura in cumün. La società Grotta da cultura es gnüda fundada fingià in avrigl dal 2006 cull’intenziun da spordscher ün lö d’inscunter, arrandschamaints culturals, exposiziuns d’art, cuors e sairadas da discussiun per indigens e per giasts.
Il schler dal hotel Rezia da quella jada d’eira ün local perfet ed ha güst eir dat il nom a la società. Il prüm president es stat l’artist fich ingaschà, Gian-Andri Albertini.

Per avair ils mezs finanzials bsögnaivels s’haja organisà la stà dal 2006 üna festa remarchabla. Differentas gruppas da musica ed üna pruna agüdontas ed agüdonts s’han ingaschats gratuitamaing e divers artists ed artistas da l’Engiadina han regalà da lur ouvras per pudair realisar ün inchant d’art inschmanchabel. La società Sent-Turissem ha cumplettà il guadogn cun üna contribuziun generusa. Uschè han ils commembers da la gruppa da lavur pudü pitturar ils locals e construir paraids per exposiziuns ed ün palc. Fingià in october dal 2006 s’haja pudü festagiar l’avertüra. Da prüma davent han gnü las diversas occurenzas grond success.

In avrigl dal 2012, cuort davo il giubileum da 5 ons, es gnü vendü l’hotel Rezia. La società ha pers seis bel schler ed ha stuvü tscherchar lönch nouvas localitats. Adonta da la lunga interrupziun e da la mort inaspettada da Gian-Andri Albertini han ils commembers da la gruppa da lavur chattà l’energia per cumanzar amo üna jada da prüma. Cul agüd d’ün pêr collavuraturas nouvas ed eir plü giuvnas es statta als 14 da favrer dal 2014 la reavertüra da la Grotta da cultura illas localitats nouvas.